Bahala Na
Paglipas ni Lope K. Santos
Setyembre 7, 2010
Kung tayo’y mabigo sa pangakong asam,
Magwagi ang puso ay wala nang puwang;
O kung tayo kaya’y sumirang sumpaa’y
May takda pa kaya tayong aasahan?
Sa pabuhul-buhol na buntunghininga,
Ang panalag nati’y isang Bahala Na!
At kung manalunton kata ng landasin
Doon sa kanlungan nitong takipsilim,
Subalit madawag ang saboy ng hangin
At madaming sagkang buhanging matalim;
Kata’y mamumulot ng nabaling sanga
At tungkud-tungkurin itong Bahala Na!
Sakaling napagod ang katawang hukot
At wala nang puwang ang himbing ng tulog,
Ang aliw ay bitwing pumapasarurok
Na batid mo namang hindi maaabot
Kahit isang laksang dating ng umaga;
Humikab ng isang wikang Bahala Na!
Bahala Na’y laging bukal nitong isip,
Laging kaakibat at sakbat sa dibdib;
Dahil ito’y tapang sa pandaw-ligalig,
Kamanyang at lawrel sa buhay na amis.
Anumang sapitin pag-asa’t parusa,
Huwag ikalunod usal-Bahala Na!
Bagong Puna